#1  
قديم 11-15-2016, 09:08 AM
شيماء شيماء غير متواجد حالياً
عضو جديد
 
تاريخ التسجيل: Nov 2016
المشاركات: 3
افتراضي لا أحب خطيبي

السلام عليكم ورحمة الله وبركاته
أولاً بدي استأذن اكتب بالعامي ومرات رح اكتب بالفصحى
بيبقى العامي أريح لما الواحد بحب يفضفض ، وعلى العموم مو مهم اذا حدا قرا أو ما قرا اللي عم اكتبه
رد أو ما رد.. المهم اني أكتب ، بعد ما ضاقت علي السبل ، ما فيني احكي لأخت ولا لأم ولا لأب ولا لرفيقة ولا حتى أكتب على دفتر يمكن يطلع عليه حدا، أو حتى مستند ع اللابتوب بسبب تعطل الوورد، ما لقيت غير افتح أي منتدى اسلامي وخلص..
فضفض فيه لأن قربت اتعب والله من اللي حاسة فيه جواتي ومو قادرة شارك فيه أي حدا..

من حوالي ست أشهر كنت بسوريا، وكنت عم حضر مع أبي وراق الطلب لكندا ، بشتغل بمشفى وعندي عيادة للتغذية، أموري النفسية جيدة ومليانة طموح ومولعة جدا جداً بالعلم
عمري 26 سنة ، كبرت بحماة، المدينة اللي بتتزوج البنت أو بتنخطب فيها بس لأن بشرتها بيضة أو عيونها زرق أو شعرها أشقر ، بغض النظر عن علمها أو دينها إلا من رحم ربي..
الحمد لله على قدر من الجمال بس ما عندي هي المواصفات ، اشتغلت بعد تخرجي تقريباً سنة ، ومرت فترة قريب 8 أشهر احتكاك مع بنت بالعمل بمواصفات البشرة البيضا ، مخطوبة وناطرة خطيبها يبعتلها من ألمانيا لتروح لعنده ، سبحان الله ما ضل حدا ما اتصل ع القسم لعنا أو سمعها حكي أو لحقها بالباص كرمال يخطب ودها وينكسر قلبه انها مخطوبة، يعلم الله اني بتمنالها كل الخير ، ويعلم الله عمري ما حسدتها ولا تمنيتلها شر..
بس الموضوع كان يضغط علي ، وهي عندها اعتداد كبير كتير بنفسها خلا الضغط علي أكبر ، واجتني فترة كل يوم مرة أو مرتين يسألوني: انت متزوجة؟ ليش لهلأ ما انخطبتي؟
غير أمي اللي تضلها تسمعني كلام بسم البدن، عاد يا حجة والله أنا محسنة وصغيرة ، كلمة صغيرة تخليها تضحك ضحكة مخباية عندها ومكشوفة عندي، شو صغرك يا بعدي؟
رفضت كل الخطاب اللي تقدمولي بحماة، طبعاً لأني بكره المدينة وما بتفق مع شعبها نهائياً، بعرف أن جذور عيلتي دمشقية وشايفة حالي بهالقصة، المهم ماني من حماة المقيتة الله المستعان.
شعب جاهل جداً، بحب البيضة شقرا عيون زرق، حسود للغاية، ما في معنى لكلمة أصل أو ترباية أو خدمة لله، والدين ضايع إلا من رحم ربي.
سافر أبي ع السعودية ليطلعلنا فيزة زيارة، كرمال رحلة كندا حسب شروط الطلب.
خلال شهر، دخلت على 4 خطاب، آخر تنتين طلبوني بأسبوع واحد، أول وحدة أجلت ماما الحكي معها لتخبر أبي وتعطيني فرصة فكر، والتاني اجا عن طريق أختي بتركيا، عرفت أن رياضي، حبيت مهنته وقلت بنفسي أنا أخصائية تغذية أكيد رح نتفق جدا، ومدحتلي أختي جداً بتدينه وأخلاقه العالية وروحه المرحة، وسمعتني تسجيل لصوته وهو عم يصلي الضهر إمام بزوجها.
كيفت، قلت هاد طلبي، رديت الخاطب الأول وقبلت بالتاني، بعتناله صورة الي وأخدت صفحته ع الفيس، والأمور كانت كلها تمام..
حكيت تلفون معه، عرفت أن ما معه تاسع!!!!
العلم كان عندي بعد الدين والأخلاق أهم من الدنيا وما فيها، ترددت كتير، حتى استشرت شخص حكالي اذا في تفاهم لا تخافي، ودكتورة حكتلي: شوفي فلان دكتور قد الدنيا بس مع زوجته وأولاده سيء جداً..
وافقت، ويا ريتني تمهلت مليون مرة..
صرت احكي معه تلفونات قبل عقد القران عشان اتعرف عليه بعلم من أهلي، بعد ما أخدت فتوى من شيخ تبين بعدها أن مو صحيحة، حبيت حنيته وكلامه الطيب وأخلاقه الظريفة، بس... ما في علم!!! بالمرة!!! ولا شي
ما بيعرف يقرأ، لا عربي ولا غيره، ما بيعرف يكتب متل الناس، على قد ما أنا مولعة باللغات وبكره الأخطاء اللي بتكون بالمعنى عدا عن القاعدية، هو عنده أخطاء إملائية بتجيب الجلطة!!!!
مو حافظ من القرآن غير آخر صفحة! وحفظه خطأ ونطقه خطأ، وحتى لما بيحكي بحاول كتير يكون مثقف ويحكي علم ويراوغ وأنا بكرهه بزيادة، لأن الجاهل أحب على قلبي من اللي عامل حاله متعلم، أحياناً بمرقله اياها وبكرهه بزيادة، وأحياناً بضطر اجرحه كرمال ما اكرهه..
رد مع اقتباس
  #2  
قديم 11-15-2016, 09:27 AM
شيماء شيماء غير متواجد حالياً
عضو جديد
 
تاريخ التسجيل: Nov 2016
المشاركات: 3
افتراضي

سافرنا ع السعودية بعد تعسيرات متتالية لسافر على تركيا عند خطيبي، على أمل الحصول على فيزا من هون
قبل الأضحى بحوالي 15 يوم...
قفعت معي القصة، بعد ما كنت عم احكي معه ع التلفون وكان معصب كتير، فكرني سكرت.. وسمعته بيحكي مسبات وشتايم قرفت منها كتير، غير قصص الضرب اللي بودي ع المشفى اللي عملها الفترة الماضية بحكم أنه عضلنجي وبخوف
عملتها حجة، وخبرته تاني نهار وقلتله أن هاد الأمر جذري عندي، وأن بدي 3 ايام لفكر بعلاقتنا من جديد..
حكالي: انا عمري أذيتك؟ قلتله طبعاً لا.. لسا نحنا مخطوبين، بس شوف تعاملك مع الناس!! سب وشتم وضرب
انهار نفسياً وصار يبكي ونزل صور ع الفيس أن مريض وعمل حركات ولدنة كرهته بزيادة
حكيت لماما، وحكيت لأبي أن ما بدي اياه
ما حبيته مو قادرة، أول عشر دقايق تفهمني وحكالي حاسس فيكي والله، ما بتشبهي المخطوبين بشي، ما بتضحكي من قلبك ولا فيكي روح المخطوبة ودلالها..
بعدين تذكر بيت حمايي بحماة، ماسين البيت تبعنا للحراسة ، كرمال ما ياخدوه الشبيحة بعد ما فضي..
حس بإحراج شديد جداً وانخبط، وبلش يبهدلني ويخانقني وما خلا مسبة علي الله يسامحه
خلاني ابكي دم، وبعدين أخد تلفوني، وصار يفتش رسائلي وشاف رسالة بيني وبين عم غريب الي ، بحكم والدي بستشيره ببعض أموري لأني بحسه حكيم جداً ومتفهم، ومتعلم وبحب الثقافة، وكان ضد خطوبتي لما استشرته وحكيتله عن فرق المستوى العلمي بيني وبين خطيبي، حكالي: أنا عارف شو شيماء لذلك ما نصحتك..
ما قدرت كمل المحادثة معه!! لأن أبي أخد التلفون وقهرته جداً المحادثة
صار يبهدلني بأسوأ الكلام، طبعاً كدافع من الضغط علي لأرجع لخطيبي
كانت أختي المتزوجة بالأردن على تواصل معي، كمان قرا رسائلها وبهدلها وغضب عليها
بس كنت آخد منها القوة، كانت تقلي معلش هي فورة وبتمرق يا شيماء
بس لا تغصبي حالك، والله كلنا شايفين انت وفلان مو ظابطين على بعض!
مضى 15 يوم، تعرضت فيها لأصعب أيام عمري، ضغط من أهلي ، حرموني من اللابتوب والتلفون وخبرني أبي أن عمره ما رح يعيد ثقته فيني، جرحني لما خبرني مفكرة حالك دكتورة وانت شقفة اخصائية تغذية، وكلاااام كتير بهدل كرامتي وشرفي لدرجة اجتني حركة انشل فيها جسمي، ووقعت من السيارة ع الشارع..
تعاطفوا معي كم يوم، ورجع أبي يدعيلي بدل ما يدعي علي
أمي ضلت على تواصل مع خطيبي، وصارت تتعاطف معه كتير، حبت حنيته عليها وكلامه الحلو معها ويحكيلها ديري بالك ع شيماء ، بطلت تحكي معي... وصارت تعاملني كأني حطيت!!
صرت صلي وابكي، اصحى ونام وهي ما بتحكي معي، رحت بست رجليها وبكيت عندها واحكيلها يا ماما والله ما حبيته افهميني، قال اعملي اللي بدك اياه، ورجعت كمان ما تحكي معي وتتواصل مع خطيبي وتحكيله أنا عم اضغط عليها كرمالك، والله أنا حبيتك وما برضالك اللي بصير فيك.
مرة صحيت الصبح سمعتها عم تدعي علي، وتحكيلي حماتك مرضت بسببك ، بدك تموتيها الله .....!!
علماً حماتي مالها خبر، بس حسها قلبها..
كان موقف أمي متل الأكل المر، أو النوم ع الشوك.. هلكتني، قررت ريحها وحكيت أكيد رب العالمين ما بضيمني اذا اخترت برها!
ورحت صباح العيد بست ايديها وحكيتلها اللي بدك اياه بصير!
رجعت احكي معه وتحججت للكل أن هي عين صابتني وجابولي شيخ قرالي قرآن حتى اقتنعوا ورجعت المي لمجاريها عند الكل..
إلا عندي!!!
رد مع اقتباس
  #3  
قديم 11-15-2016, 09:36 AM
شيماء شيماء غير متواجد حالياً
عضو جديد
 
تاريخ التسجيل: Nov 2016
المشاركات: 3
افتراضي

وأفوض أمري إلى الله
إن الله بصيرٌ بالعباد..
رد مع اقتباس
إضافة رد


الذين يشاهدون محتوى الموضوع الآن : 1 ( الأعضاء 0 والزوار 1)
 
أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع


الساعة الآن 07:48 PM.


Powered by vBulletin® Version 3.8.6
Copyright ©2000 - 2019, Jelsoft Enterprises Ltd. TranZ By World 4Arab